Koncerti me Ilahi të Yunus Emre “Kur flet gjuha dëgjon veshi, kur flet zemra dëgjon gjithësia”

08/06/2018

Me bashkëpunim të Ministrisë së Kulturës dhe Turizmit të Republikës së Turqisë, Bashkisë së Stambollit dhe Bashkisë Shkodër, u realizua koncerti me ilahi të Yunus Emre, i titulluar “Kur flet gjuha dëgjon veshi, kur flet zemra dëgjon gjithësia”.

Ekipi i muzikës artistike dhe mistike turke u takua me shkodranët në aktivitetin e organizuar ditën e Enjte, më datë 7 qershor 2018, në teatrin “Migjeni” të Shkodrës.

Në fjalën e mbajtur para programit, Kryetarja e Bashkisë Shkodër Voltana Ademi shprehu kënaqësinë që ndjen nga bashkëpunimi me Institutin Yunus Emre Shkodër për realizimin e aktiviteteve ku zënë vend uniteti emocional dhe vlerat e përbashkëta.

Ndërkohë që sekretari i dytë pranë ambasadës së Republikës së Turqisë në Tiranë, Oğuz Tekat specifikoi ndikimin e thellë dhe vendin e veçantë që Yunus Emre ka krijuar jo vetëm në zemrën e popullit turk por të çdokujt që e njeh atë; drejtori i orkestrave pranë Bashkisë së Stambollit, Celal Sevencan u shpreh duke thënë: “U kushtojmë rëndësi të veçantë aktiviteteve kulturore që kanë për qëllim promovimin e kulturës së vendit tonë dhe zhvillimin e mëtejshëm të miqësisë me vendet e tjera. Veprimtaritë bashkëpunuese të institucioneve të ndryshme për këtë ndërveprim kulturor janë shumë të rëndësishme.”

Në fjalën e hapjes drejtori i Institutit Yunus Emre Shkodër, Zafer Kıyıcı tha se poeti mistik Yunus Emre është një personalitet që ka injektuar dashurinë, paqen dhe vëllazërinë.

Pas fjalimeve filloi koncerti i ilahive të Yunus Emre i realizuar nga ekipi i muzikës artistike mistike turke, solisti Adem Tay duke u shoqëruar me shfaqjen “Semâ”. Koncerti, i cili shënoi pjesëmarrje të dendur të shkodranëve përfundoi me dhënien e pllakatave dhe fotografime në shenjë kujtimi.